المجتمع

أنــــواع الحب عند الــــــــتونسي

 الحب مجموعة متنوعة من المشاعر الي تأثر برشا على الشخص الي يكون في الحالة هاذي لكن مع الوقت تغيرت مفاهيم حول الحب ما بين الناس ، ثما الا يخلي الحب يكون من اولويات حياتو و ثما الي بالنسبة ليه الحب حاجة ثانوية و ثما الي يستعمل الحب لاغراض اخرى .

سألنا مجموعة من التوانسة على نوعية العلاقات الي عاشوها باش نتعرفو عليها في السطور الجاية.
هانا مع بعضنا تو كل شي يجي بطبيعتو :
هانا مع بعضنا تو كل شي يجي بطبيعتو كلمة ديما نسمعوها خاصة في العلاقات العاطفية خاصة من طرف الشاب التونسي كي يكون في علاقة عاطفية ، العلاقة هاذي علاقة غير متلزمة و غير مسؤولة في العادة تنتهي بكلمة "الله غالب ما تفهمناش" انت تستاهل خير مني" "مازلت صغير ما كونتش روحي" و ""العزوزة مش حابة عليك" الخ.
 
لا نحبك لا نصبر عليك :
كلمة ديما نقولوها خاصة في العلاقات العاطفية هي عادة علاقة سامة يكون فيها "حب التملك" سيد الموقف و فارغة من مشاعر الحب الايجابية و فيها برشا انانية من احد أطراف العلاقة الي يكون يحب يستحوذ على الطرف الاخر و يحاول يحصروا و يخليه يقطع علاقاتو مع الاخرين و فيها زادا برشا اساءة و تطييح قدر الحاجة الي تضر برشا الطرف الاخر و علاقة "لانحبك لا نصبر عليك" ديما نهايتها معروفة.
نحبك اما...
الحب المشروط في العادة علاقة مش مريحة و متعبة لأنو ديما أحد الأطراف في العلاقة هاذي يكون مش قابل الطرف الاخر و ديما ينتقدو مثلا "شبيك سمنت" "انت ضعيفة برشا" "شبيها لبستك هكا" "نحب شعرك طويل" "شبيك تحكي هكا" الحاصيلو يخرج عيوب الدنيا الكل و ينجم يحاول يبدل شخصية الطرف المقابل و الاكيد هذا ينجم يكون كل شي الا حب لأنو الحب يا يكون "حب لا مشروط" يا إما لا.
حب العقل :
الحب العملي يكون قائم على العقل مش على المشاعر و ديما يوفا بالعرس و النوعية هاذي من العلاقات تشبه برشا للزواج التقليدي لانو العلاقة لهنا تكون مبنية على الحسابات لانو ديما الحالة المادية و المستوى الاجتماعي هي الشروط الاساسية في اختيار الراجل و الا المرا و نجموا نلقاوا علاقات ناجحة لكن تكون ديما فارغة من داخل خاطر مافيهاش مشاعر.
الحب الي مبني على المظاهر :
هو حب فارغ مبني على المظاهر ديما نلقاوا احد الطرفين و الا الاطراف الزوز يكونوا و أكيد لغاية في نفس يعقوب كيما يقولوا يلوجو على الفلوس و الا على الجمال و الا على الفيس قدام الناس و اكيد العلاقات هاذي ما تطولش و فيسع ما توفى لانها من اكثر العلاقات السطحية و الفارغة.
الحب الي مبني على العشرة
نوعية الحب هذا نلقاوه ديما بين الازواج التوانسة و نلقاوه في عايلتنا ما بين والدينا هو تعود و يكون ثما صداقة و نوع من التوافق بحكم انها العلاقات هاذي طويلة المدى تلقى الاطراف الزوز عارفين بعضهم شنوا يحبو و شنوا ما يحبوش مثلا شنوا لونهم المفضل شنوا ماكلتهم المفضلة الخ..العلاقات هاذي كيما قلنا طويلة المدى و من العلاقات الي نجموا نقولوا عليها ناجحة و أصلية و فيها برشا احترام و قدر ما بين الكوبل.
حب الليسي
حب الصغر هو حب طفولي و بريء و فيه برشا شغف لانو كي نبدوا في العمر هذاكا يكون عندنا رغبة في تجربة المشاعر الرومانسية خاصة البنات الي يكونوا في العمر هذاكا متأثرين بقصص الحب الي يشوفوها في المسلسلات و الافلام لكن بعد فترة نكتشفو انو كان مجرد اعجاب او تعلق و كي نكبروا ممكن نخزروا للحب هاذي بشيء من النستولجيا و شكون منا ما يتفكرش حب صغرو.
الحب الحقيقي
باش ما نكونوش سلبيين في تقييمنا للحب و المشاعر و باش ما تأثرش علينا العلاقات العاطفية الفاشلة الي نشوفوها كل يوم أكيد ثما "الحب الحقيقي بيعش يا حبيبي" كيما يقول محمد فؤاد هو حب غير مشروط فيها برشا محبة ، احترام ، تعاطف و مساندة و رابطة قوية بين الطرفين اكيد فيه مشاكل لكن كي يبدى موجود الحب كل شي يتعدى و نتجاوزوه.
و في النهاية ما ننكروش الي الحب احساس مزيان برشا يحليلنا حياتنا و يدفيلنا قلوبنا لكن الاهم قبل كل شي ما ننساوش نحبو رواحنا باش نجموا نعطاوا حب صحي للآخر لأنو فاقد الشيء لا يعطيه.
 
 
أحلام شرميطي