بنزرت : تلميذ مهدد بالطرد بعد انتقاده لتعطل الاشغال و انتشار الفضلات في معهده

و في ما يلي نص التدوينة : السلام، هاذا ما يسمى بالمعهد النموذجي ببنزرت، الليسي الي منطقيا تكون ظروف العمل فيه مريحة و أبسط مقومات النجاح بتفوق متوفرة ، علميا القراية 24/24 ماعندها وين توصل و القيام بأنشطة رياضية ضروري، باهي في التصاورالأولى هذا ملعب كرة السلة، الي بدات فيه أشغال حفر من بداية السنة الدراسية الفارطة، الأشغال دار عليها العام و حال الستاد بقات كيما هيا، يقول القايل علاش موش على الأقل في الصيف خدموه و كملوه ؟؟؟ الله أعلم، المهم احنا “بيلوت” و ديما نقراو مناش متاع بسكات.. و على ذكر ظروف العمل ، الزبلة هاكي حشاكم مكدسة كل يوم قدام الباب الفرعي و الي تعطي صورة أكثر من رائعة للمعهد “النموذجي” متاعنا.. الزبلة هاكي تلقاها على أشكال أخرى الداخل ، كيما الغبرة المنتشرة في كل بلاصة، دورات المياه ( مانغير مانوصف ..) ، الشبابك و البيبان المكسرة و الحيوط الي يتم دهنها مرة في 4 سنين ولا في المناسبات .. و مانغير ماننسى البيبان الى سكروها مؤخرا ، المعاملة بالأكتاف ، كلاس 3رياضيات فيه 27 تلميذ نتنفسوا بالpاي، و التشكيات من التلامذة المقيمين و أنصاف المقيمين .. حاصيلو.. كل هذا و أكثر تجدونه كل يوم بالمعهد النموذجي، وجه بنزرت و تونس و شمال افريقيا ..