ثقافة و فن

زوجة سمير الوافي توجه اليه رسالة مؤثرة بمناسبة عيد ميلاده

نشرت حنين الزغير زوجة الاعلامي سمير الوافي رسالة مؤثرة بمناسبة عيد ميلاده تحدثت فيها كيف كانت تخطط لأن يكون هذا اليوم استثنائيا وما الذي يقوله لها عند كل زيارة ومدى حبها له.
يذكر ان سمير الوافي موقوف في السجن بتهمة تبييض الاموال و التحيل وفي ما يلي نص الرسالة: "سمير.. اليوم 22 ديسمبر نهار عيد ميلادك النهار هذا ستنيتو عندي برشا.. أول عيد ميلاد و احنا معرسين حضرت فيه برشا حاجات في مخي و خممت شنوة باش نهديلك و كيفاه باش نخلي النهار هذا يتعدى سبسيال و مش كيف النهارات لخرين ..خممت من قبل العرس وين و كيفاه.. و هو جا نهار عيد ميلادك و طلع نهار بالحق سبسيال .. اما موش كيما حبيت انا و كان جاو قالولي الي نهار هذا باش نكونوا بعاد على بعضنا نقلهم مستحيل اما ربي حب هكا…الحمدلله على كل حال.. كل مرة نمشي نزورك فيها ديما تقلي نفس الكلام.. حنين نعرف الي انتي تاعبة معايا سامحني تعبتك.. انا يا حنين ما نخمم كان فيك و كان جيت عازب راو الحبس كان اهون عليا ببرشا.. و مع هذا عمرنا لا بكينا و لا تأثرنا و ديما قويين قدام بعضنا..و انا توا يا سمير نحب نقلك الي انا مانيش تاعبة و نعمل في كل شيء بحب كبيييييير و أقل حاجة تنجم تعملها اي مرا انها تاقف مع راجلها في محنتو و مش مزية الناس كل تغلط و الدنيا دروس.. انا نعرف الي انتي اليوم باش تكون حزين و متقلق و تحس في النفس الي نحس فيه انا.. اما فما كلمة ديما تقولهالي كي نجيك.. حنين تو نعوضوا كل شيء و انا زادة نقلك تو نعوضلك النهار هذا و النهارات الي تحرمنا فيهم من بعضنا و الي صارلنا ما ينجم كان يقوينا و يقوي حبنا..و اي انسان حاول يزيد يغرق سمير حتى و لو بكلمة نقلو يوم ليك و يوم عليك صدقني دموعي ما تمشيش خسارة بإذن الله .. حبي الغالي كل عام و انتي حبي و انشاء لله الي جاي خير و ربي يعوضنا و ما يدوم حال".