أكد الخبير الاقتصادي معز الجودي ،ان الدولة التونسية هي الوحيدة القادرة على جلب لقاح فيروس كورونا عن طريق مؤسساتها الرسمية و ذلك في على اثر اعلان كريم الغربي المعروف بـ"كادوريم" عن مساعيه لتوفير "اللقاح الصيني" للتونسيين.
و قال الجودي في تدوينة نشرها عبر حسابه الرسمي بموقع التواصل الاجتماعي "فيسبوك" ما يلي :
واحد رابور (Rappeur) يخدم في صورتو و يشوف في روحو رئيس بلاد فالسة، جاي يستبله في العباد بفلوس ما يعرف عليها حد منين جاية؟! ٱخرتها، هبط روحو زعما مصور مع أشخاص أجانب و قالك قاعد إتفاوض مع الحكومة الصينية بش إيجيب التلاقيح متع الكورونا لتونس و ينقذ الشعب التونسي من الفيروس القاتل؟!! المشكل موش في كذب و إستبلاه الشخص هذا، المشكل في بعض وسائل الإعلام إلي تنقل في "الخبر" و تبشر في المواطنين و المواطنات بالفرج؟!! أول حاجة، في تونس القوانين واضحة: الدولة التونسية عن طريق مؤسستها الرسمية وحدها عندها الإحتكار في مجال الأدوية و التلاقيح. يعني ما فما كان الدولة بيدها تنجم تتفاوض و تورد تلاقيح و أدوية للبلاد. الصيدلية المركزية مثلا عندها إحتكار (monopole) توريد و إعتماد و منح تراخيص توزيع الأدوية و التلاقيح. و فما إدارات عامة و هياكل عمومية هيا إلي تراقب العمليات هذي و تضمن سلامتها و traçabilité متع كل عملية. ثاني نقطة، الدول و الحكومات الأجنبية عمرها ما تتفاوض مع أشخاص خاصة في مجلات دقيقة و حساسة كيما التلاقيح و الأدوية. ثالث نقطة، الصفقات و النقل و اللوجيستيك متع التلاقيح تتكلف مليارات و لازمها شركات و مؤسسات عمومية تسهر عليها و تقوم بيها.
بربي يزيونا من الشعبوية و الأخبار التافهة، البلاد في القاع و ناس مازلت تعفس و إطيح فيها للحضيض! يا توانسا فيقو، ما فما حتي شخص مهما كان و وصل، إنجم إيجي بفلوسو إمنع بلاد و شعب و يصرف عليكم!! بربي فيقو و ما تخليوش رواحكم عرضة للإستبلاه و التحيل!!!